Société

Société

Reginald BOULOS ? Ta Sanble li Sensè nan pwopol yo amwens kem Twonpem

Me Magnekell REGULUS

lepresidentmagnekell@gmail.com

Nan batay mwen pou defann dwa OUVRIYE e travay avek majorite sendika ki nan sektè soutretans lan, sa koz mwen manke pèdi vim 2 fwa. Yon premye fwa yo fann tout figim ak kòs zam pandan m’ap soti nan yon emisyon sou chèn 2, Storm TV , e yon dezyèm fwa yo monte polisye al tann mwen, tire sou mwen a tel pwen map viv ak yon fwagman bal nan pyem jis paske m’ap batay pou fè FAKTORI yo peye ONA pou tout OUVRIYE paske si nou wè patwon ki nan sektè soutretans yo gen difikilte pou bay OUVRIYE yo #Kat asirans ONA, se paske tousenpleman yo peye pou yon ti gwoup e pa peye pou yon bann lòt e sa mete yo nan difikilte pou yo bay #kat ONA vu ke yo paka bay yon gwoup pou kite yon gwoup.Donk, pou tout rezon sa yo Me Magnekell REGULUS se pi gwo bèt nwa pou ti mesye dam patwon yo nan sektè soutretans lan e sa te rann mwen genyen gwo pwoblèm avek anpil anpil moun nan sektè prive a e pami yo Reginald BOULOS malgre li pa nan sektè soutretans lan e malgre tou li pagen anyen pou wè avek sam sot eksplike anlē yo kòm ensidan ki te rivem.Men patwon sou tretans yo telman konpòte yo mal avek OUVRIYE yo, sa te fèm gen pwoblèm nan lesprim avek de moun ke anreyalite kem pagen anyen avek yo nan sente prive a.

Men aprèm fin tande reyaksyon BOULOS aprè evenman 6,7,8 jiyè yo, lèm fin tande li nan Radyo Mega avek Guerrier Henry nan emisyon BOUKANTE LAPAWÒL, nan emisyon sou Radyo San Fen ak maten an sou radyo Métropole, mwen pa konnen sim twonpe menm estime ke BOULOS fran e sensè nan diskou li e pwopozisyonl yo paskem pa fini konstate yon bagay andedan sektè prive a dènye jou sa yo e sitou aprè 6,7,8 jiyè, genyen yon ti gwoup ki ta vle finalman bagay yo chanje paske si sitiyasyon pèp la pa amelyore yo menm tou yo an danje e *TA* sanble Reginald fè pati de ti gwoup sa sim ta kwèl nan pozisyon li depi yon bon bout tan… Men ta sanble tou genyon gwoup konsèvatè nan sektè prive a ki konfòtab nan pa peye ONA pou anplwaye yo, pa peye OUVRIYE, pran ladwàn annotaj, fè kontrebann elatriye.

Reginald, mwen tandew maten an avek anpil atansyon e enterè, ou konvenk mwen tou piti paskem fini pa rann kont kew mwens dyabolik ke jan yo vann ou an ou petèt janm te konprann ou avan em ta swete se pa yon pèsepsyon w’ap vann men reyelman ou sensè nan sawap di yo paske nou panse aprè anviwon 215 lane de divisyon ant klas yo ki rann peyi a divize ak kesyon nèg anwo nèg anba, nèg wouj nèg nwè alòske nan dosye imigrasyon nou tout se #black yo make. Li enpotan poun rekoud peyi a, li enpotan tou pouw ede leta batay pou pèmèt anpil lòt moun ki nan klas ou an liberalize mache a kote ni nèg wouj ni nèg nwè ka envesti nòmalman e pèmèt lòt konpayi etranje vin envesti paske sektè ou ye pè konpetisyon. Mwen kòm moun k’ap batay depi yon bon bout tan pou fòse leta respekte atik 137 kòd travay la sou kesyon salè minimòm, lèm tande ou menm nan Delimart yo ou te peye moun yo plis ke sa leta fikse a mwen te felisite ou men konbyen moun ki nan sektè prive a ki deside bay egzanp sa ?

Nou vle peyi a rekoud, e lèm fin tandew janm te di anlē a ou konvenk mwen, men kilè ou swete fè yon batay tout bon vre nan sektè ou ye a, nan klas ou ye a pou pèmèt ke sistèm bankè a liberalize kote nenpot moun ou gwoup moun ka rantre ladanl ? Kote nenpot moun kit li te soti anwo ou anba ka enpote bato diri li janl vle san krent ?

Antouka lèm fin tandew, mwen estime touni w’ap pran la siw vle ou ta ka mennen batay sa nan sektè paw la pou yo ta omwen pran konsyans ke nou nan menm avyon. Petèt yo ka nan premye klas e klas pam nan ka nan dènye klas la, men si nou pa antann nou poun bay avyon an yon bon direksyon, mwen garantiw sil tonbe se fout nou tout k’ap peri, paske jan lòt la te dil, si nou pa antann nou poun viv ansanm kòm frè, nou tout ap mouri ansanm kòm yon bann enbesil. Mwen santiw fran BOULOS, e map mande eskew paka konsyantize klas ou an sou nesesite poun rekoud peyi a ?

Me.Magnekell REGULUS
Sekretè egzekitif SOS-DEMOKRASI
(+509) 3749-2130

Related posts

Leave a Comment