Société

Société

Yon ti Repons a Roody Roodboy

Me Magnekell REGULUS

lepresidentmagnekell@gmail.com

Mwen toujou pran sanm poum tande Kanaval chak ane e sitou Kanaval jèn Atis yo paskem kwè nan emèjans kòm moun k’ap goumen pou yon lòt jenerasyon politik ak ekonomik. Men Roody, mwen te komanse swiv ou depi lèw te patisipe nan Digicel stars, mwen te estime ou gen anpil talan em se youn nan moun ki te votew men domaj ou pat pase lè a.

Lane dènyè mwen pran sanm poum tande Kanaval ou an, mwen pap baw manti se te vrèman bon bagay, e sensèman bravo sitou pou tèks la. Otrejou, lèm aprann manmanw mouri nan lopital Kanapevè paske yo te dwe mete men sou li pou 25000 goud, men kòm li te manke 5000 goud yo pat mete men e kounye a manmanw komanse ap pouri anba tè jis paske leta ke konstitisyon an fè obligasyon pou garanti nou sante pat fèl, poum onèt avek ou sa te chokem a tèl pwen nan emisyon mwen ko-anime avek senatè Jean Renel SENATUS, mwen te revolte e menm mande senatè yo vote lwa sou sante obligatwa SENATUS depoze depi lontan nan Sena Repiblik la.

Mwen menm Magnekell REGULUS, moun Wanament ki angaje depi yon bon bout tan nan defann dwa moun atravè SOS-DEMOKRASI, lèm tande kanaval 2018 ou a kòm pitit sòyèt menm jan avek mwen ki soti Fò Nasyonal, mwen panse se te yon nouvo fason pouw defann ou menm tou dwa yon ti pèp y’ap topizi lontan. Men lèm vin tande Kanaval 2019 ou an, mwen pèdi e m’ap mandem eske se ou menm ?

Gen 2 bagay ki sitou enteresem nan kanaval ou an :

1- Ou trete Pèp la de yon pèp SOVAJ

2- Ou di Palmantè ap fè milyon sou do pèp

Kontrèman a moun k’ap diw se PHTK paskew salye Mme Sophia Martelly, Olivier ak M.Martelly avek yon ton ki fèm pa doute kew se bon zanmi yo, mwen pap kategorizew e sitou ou gen dwa pouw fè pati de kouran politik ou vle e sa fè pati de dwa fondamental ou. Men avanm baw repons lan, kitem dabò raplew kèk ti bagay kem estime ou bliye oubyen inyore : *Eskew konnen lè yon pèp paka jwenn manje, sante, dlo, edikasyon, seyon fòm de vyolans ke sosyològ yo ta ka rele vyolans senbolik ke leta egzèse sou pèp la ? Eskew konnen yon peyi kote enjistis devni lwa Rezistans lan devni otomatikman yon devwa ? Eskew te konnen yon pèp kite gen 4 milya 257 milyon 598 mil 589 dola ameriken pou fè devlopman, yon ti gwoup moun kraze li pou kont yo san yo pa fè lopital ki pèmèt manmanw mouri jodia e ki pa fè ni inivèsite ki pèmèt ou mwens konprann vyans leta fè sou pèp la ?

*Eskew konnen vyolans etatik yo anjandre toujou vyolans popilè ? Eskew panse yon pèp leta dwe dlo, kouran, manje, sante,* *edikasyon elayriye leta pa bay li malgre sa li pa soulve fasil ou panse pèp sa SOVAJ janw pansel la ? Pou ou menm* *sitiyasyon ekonomik e sosyal pèp la ye ladanl jodia sil leve kanpe se SOVAJ li SOVAJ ? Ou di palmantè ap volè milyon menm lèw pa wè* *prezidan, minis, direktè jeneral em ka konprann ou paskew pa gen* *entansyon pale egzekitif la mal pou sa pa kozew de domaj, men si pèp la manifeste* *mekontantman li pou* *milyon ou di palmantè ap vole yo, daprè ou se* *SOVAJ pèp la SOVAJ ? Ou pa santiw an* *kontradiksyon avek tèt ou lèw ta vle fè konprann* *gen bagay ki pap mache pandanw pa vle pèp la revolte kont yo ?*

La, mwen konnen ou ka di ou pagen pwoblèm manifeste men pa kraze. Mwen menm tou mwen pa renmen kraze brize a…. Men eskew konnen kraze brize a se pa li ki pwoblèm nan se efè pwoblèm nan li ye ? Eskew konnen peyi kote ki gen leta tout bon, yon senp atik, yon mach pasifik, yon konferans de près, yon sit-in sifi pou fè leta tande e aji ? Men eskew konnen pa bò isi leta tande inikman pa vyolans a tel pwen nan mwa jiyè 2018 pèp la pale nan radyo ak medya anliy yo jouk li about leta pa tande koul kraze kèk bagay kotem te deplore prezidan JOVENEL di pèp la ou pale mwen tande ? Ti jèn, annou plis objektif nan travay la non menm lèm konnen fòs enterè a ka reglemante bouch ou.

Ou bliye lèw pat chanpyon nan Digicel stars, patizanw e ou menm te fè vyolans deyò a paskew estime se ou ki te dwe pase se koken yo te fè avek ou an ? Eske se paskew konnen se pou gran mesi ou tap fè vyolans avek patizanw yo ki fèw panse se pou gran mesi pèp la fè vyolans ? Mwen pap rantre nan vi privew men pouw konprann sa m’ap di a pèmèt mwen fè yon ti analoji, eske lèw te fin fè vyolans e bat Ritchelle (Atis pam) an bon SOVAJ pou gran mesi a, sil ta reyaji menm jan avek ou poul fèw respekte dwal, eske se li ki t’ap bèt SOVAJ la paskel reyaji a oubyen ou menm ki pat dwe bat li a ? Pa onètete w’ap di se ou menm…. Ebyen se menm jan, lè leta egzèse vyolans sou pèp la, reyaksyon pèp la paka fèl SOVAJ pou sa ti frè.

Mwen menm avek ou nou fè pati de menm jenerasyon, sa vle di mwen pagen entansyon detwiw kòm jèn , menm te jis vle sitou konseyew pouw pa vann ank plim ou nan ekri kanaval pou fè yon gwoup plèzi sou do pèp la. Paske chak fwaw fè sa mwen santi an reyalite ou pat renmen Manman ou vre paske pèp ou rele SOVAJ la ap batay pou li a se kòb petrocaribe a ki ta dwe fè lopital ke nèg yo kraze e se grenn rezon ki fè anpil moun mouri paske pagen lopital e pami moun sa yo, manmanw kem ta vle kwè atravè kanaval sa kew pat renmen vre, mwen ta swetem twonpe.

Me Magnekell REGULUS
Sekretè egzekitif SOS-DEMOKRASI
(+509) 3749-2130 / 4321-5041

Related posts

Leave a Comment