Politique

Politique

KONPREYANSYON PAM SOU FASON Y’AP LAPIDE VALÉRY NUMA SOU REZO SOSYAL YO

Me Magnekell REGULUS (+509)3749-2130

Jodia mwen kontan anpil wè anpil moun ap ekri, ap pale Pou denonse Vyolans k’ap fèt sou fanm e sitou denonse zak kadejak ki fèt sou etidyan Inivèsite Kiskeya ak Inivèsite de Pòtoprens. Dayè, nou se premye Oganizasyon dwa moun atravè SOS-DEMOKRASI jan tout moun konnen ki denonse ak Kondane an Premye Vyolans ki te fèt sou etidyan Kiskeya yo e se atravè Nòt nou an ke anpil moun pral aprann sa kote aprè nou pral rankontre kèk lòt Nòt ak kèk lòt moun leve vwa yo nan radyo kont sa. Seyon fason poum di nou ke SOS-DEMOKRASI te Kondane, li Kondane e l’ap toujou Kondane avèk tout fòs li tout fòm vyolans y’ap fè sou fanm tankou kadejak, nèg k’ap bat fanm, nèg k’ap mande fi bout anba yo pou djòb ak nèg k’ap trete yo de tout mo sal elatriye.

Men tou, nou Kondane Vyolans anpil moun swa nan radyo ou sou rezo Sosyal yo ap fè sou Valéry NUMA Pandan an reyalite li pat janm jistifye vyolans sou fanm, li tou senpleman te fè yon analiz nan yon emisyon danaliz kel anime chak jou sou “Vision2000”. Nan yon Premye tan, Valéry NUMA Kondane tout fòm vyolans sou fanm e di kel pa dakò ditou avèk move zak sa yo. Se sa lide pwensipal li a si efektivman nou retande emisyon an. E kòm moun k’ap fè analiz e kise yon lidè dopinyon ki konnen trèbyen lè tout moun ap di tèl bagay seyon problèm, sil vle pwopoze yon solisyon, li enpòtan pou 1- li gade sa yo di ki problèm nan èskel seyon problèm tout bon vre, 2- Ki koz li, ki orijin li e se apati de la n’ap ka pwopoze yon solisyon apwopriye.

Nan ka n’ap pale a Valéry NUMA dakò deja ke Vyolans sou fanm seyon problèm e li Kondanel. E nan tantativ pou konprann ki sak ka koz sa li di ke gen rad yon fi mete sa ka eksite yon gason, sanl pa di ke yon nèg ki eksite pa fason yon fanm abiye dwe vyolel. Li kontinye poul di ke nou poko prè pou anpil bagay nan sosyete a e se vre si nou pa deside pale ak ipokrizi. Paske si nou prè, ki sosyete nèg ap fè kadejak sou fanm lap mache trankil nan lari a san lajistis pa trakel ? ki sosyete lè yon nèg bat yon fanm, fi a pote plent e moun k’ap resevwa plent lan ap mandel sal te fè nèg la ? ki sosyete yon fanm pral mande travay patwon ou direktè a vle kouchel pou djob la ? Donk tout baz tout konsiderasyon sa yo, Valéry tante bay yon konsèy pou di medam yo kontwole fason y’ap abitye yon fason Pou pwoteje tèt yo kont de nèg ki pran plezi yo nan zak imaral sa yo annatandan ke nou batay poun non sèlman transfòme mantalite sosyete a , men tou batay pou yon Leta ki a la otè de tach li tankou garanti bonjan sekirite ak Jistis yon fason pou trake kadejakè, agresè ak tout fòm enpinite.

Men an nou sipoze ke Valéry NUMA ta fè yon Erè malgrem pa wè erè a paskel pa di sa nou di sou rezo yo…Men kòm yon nèg ki soti nan menm klas avèk nou e ki konnen yon mobilite Sosyal, li vreman pa enpòtan poun detwil kotew santi anpil moun ki ekri atik kont li yo montrew a klè ke gen kek bagay pèsonèl yap regle avèk li.

Pou dat Valéry NUMA ap bay sèvis li nan emisyon sa, Pou gwo travay msye ap fè pou resisite endistri sinema a nan peyi a, Pou dat msye ap ankouraje Leta pran responsabilite li pou evite nou ta gen move zak nap denonse Jodia, poukisa pa konn gen pèsonn ki ekri Pou felisite li e ankourajel pou bon travay sa yo ? Poukisa se pou yon analiz li pa fè avèk mechanste nou oblije agoch adwat poun detwi imaj li ? Jis kilè n’ap ankouraje moun k’ap fè efò nan peyi a ? Poukisa nou pa janm pran inisyativ felisite moun ki fè sak bon tou ? Nou pa santi nou Patisipe nan fè peyi a tounen yon jeng ? Si sosyete a konsa, ò dirijan nou yo soti nan sosyete a, ki Leta nou espere genyen ? Nou deside manje tout moun k’ap fè yon ti efò nan peyi a ? Valéry pa Zanmim, kòm tout moun li pa yon sen, men li fè anpil efò nou dwe onore sa olye nou lapidel. Alò nou yon sosyete kote moun ap ekri sou rezo pou sipòte Léonard kise yon agresè, nou ekri poun jistifye ke Arnel pa problèm, nou lapide SENATUS poun montre ke se nòmal ke yon Palmantè ap pale ak bandi, nou lapidel poun montre ke se nòmal ke Arnel Belizaire di kel gen 32 zam manch long nan menl pandan nap detwi de moun nou pa menm aprann konnen e se grav.

Nou tèlman montre a klè volonte nou poun detwi Valéry, nou koupe son an, nou pran yon ti bout pandan nou kite mizankontèks li a. mmmmmmm Mwen tap Regrèt sim pat pran sanm retande emisyon an. Tanperaman krab sa dwe chanje nan sosyete a e se revòltan.

Mwen pa ekri poum achte figi Valéry, mwen ekri paske sim kite sa pase Jodia, l’ap rive sou mwen demen.

Me Magnekell REGULUS
Sekretè Egzekitif SOS-DEMOKRASI
(+509)3749-2130
lepresidentmagnekell@gmail.com

Related posts

Leave a Comment